Jeta e Bekteshit sillet rreth basketbollit

Një jetë pa basketboll për Besnik Bekteshin është si një jetë pa ëndrra. Ai ishte gjashtëvjeçar kur babai e mori me vete në Gjermani për ta larguar nga Kosova e prekur nga lufta. Jeta në një vend të huaj për familjen e tij ishte e vështirë. Besniku një gjë pëlqente gjithmonë, topin.

"Gjithmonë më kanë pëlqyer sportet me top", tregun 17-vjeçari Besnik Bekteshi, duke kujtuar se si gjeti vend te grup-moshat e reja të skuadrës së futbollit VfL Kirchheim. Ai luante mirë, por edhe atëherë çdo ditë merrej në kohë të lirë me basketboll. Shpesh me orë të tëra kalonte i vetëm duke ekzekutuar gjuajtje në basketboll.

Futboll apo basketboll: Sa më gjatë që Bekteshi vallëzonte mes këtyre dy sporteve, aq më afër po vinte dita kur do të duhej të vendoste për njërin nga to.

"Ende mund të kthehesh në basketboll", i kishte thënë babai i tij Besnikut. Kjo ishte një këshillë të cilën e dëgjoi dhe deri më tash nuk është bërë pishman për këtë. Si 11-vjeçar ai luajti për skuadrën e basketbollit VfL Kirchheim. Me 14 vjet e përfundoi me sukses shkollën fillore në Kirchheim dhe nisi të luante për ekipin U-16 të skuadrës gjermane të basketbollit BSG Ludwigsburg dhe njëkohësisht luante edhe me ekipin U-18 të VfL Kirchheim.

Ai është me fat që pati ndihmën e ish-basketbollistit dhe trajnerit të rinjve Ross Jorgunsen, që nga momenti i tij i parë në karrierë. Në Akademinë e Basketbollit në Ludwigsburg, ai pati kontakt me David McCrayn, idhullin e basketbollit të tifozëve të Ludwigsburgut. Madje një kohë Bekteshi edhe banoi te ky i fundit.

Pos talentit Bekteshi kishte të përbashkët me McCrayn edhe karakterin.

"Nuk mund të humbas. Për këtë arsye dua të përmirësohem", thotë Bekteshi.

Por, çfarë janë aftësitë e këtij fundori që së fundi ishte shënuesi më i mirë i U-17 të Gjermanisë në Botërorin e mbajtur në Hamburg. Ai luajti me mesatare prej 15.5 pikëve, 4.8 kërcimeve dhe 2.9 asistimeve për ndeshje.

Ndodh që edhe trajneri i skuadrës së Bundesligës gjermane EnBW Ludwigsburg, të mendojë për aktivizimin e Besnik Bekteshit, ndonëse i ri në moshë për një sfidë të tillë.

"Ai ka një vizion të gjerë për lojën, një gjuajtje të saktë dhe duar mjaft të gjata", thotë agjenti i basketbollistit, Timo Probst. Besnikun një gjë e inatos shumë se është i gjatë "vetëm" 188 centimetra.
"Ndoshta edhe dy centimetra do të rritem", thotë Bekteshi, që tash e ka ndërmend të shkojë në shkollën social-pedagogjike.

Pas pushimeve Besniku do të futet në internatin e sportit në Ludwigsburg. Atëherë do të ketë pesë herë në javë stërvitje me profesionistë dhe dy herë me të rinjtë e skuadrës Ludwigsburg. Po ashtu do të ketë minutazh më të madh në ndeshjet e fundjavës, pasi Besniku shpreson të shijojë pak minuta edhe me skuadrën profesioniste.

Për të realizuar këtë ëndërr ai nuk do ta kursejë veten në stërvitje dhe po ashtu do të bëjë disa stërvitje edhe jashtë palestrës - i vetëm, kuptohet.