Ban Ki Mun këshillon Jeremiqin për Kosovën

[Beni]

Sekretari i përgjithshëm i OKB-së, Ban Ki Mun, dhe ministri i Jashtëm i Serbisë, Vuk Jeremiq, kanë mbajtur sot një takim privat, lidhur me kërkesën e Serbisë për negociata të reja për Kosovën. Ata kanë diskutuar për propozim-rezolutën e Serbisë në Asamblenë e Përgjithshme të OKB-së, pas vendimit të Gjykatës Ndërkombëtare të Drejtësisë, se pavarësia e Kosovës nuk paraqet shkelje të së drejtës ndërkombëtare, ka njoftuar OKB-ja.

Sekretari i përgjithshëm i OKB-së, u ka bërë thirrje të gjitha palëve “që ta mbështesin dialogun konstruktiv dhe zgjidhjen e të gjitha shqetësimeve të mbetura, duke inkurajuar stabilitetin politik dhe duke dekurajuar provokimet”. Autoritetet serbe kanë dorëzuar në OKB një rezolutë për Kosovën, duke kërkuar rihapjen e bisedimeve për të gjitha ‘çështjet e hapura’. Megjithëse Serbia vazhdon të këmbëngulë në negociata të reja për statusin e Kosovës, në rezolutë ajo nuk e ka përfshirë drejtpërdrejt këtë çështje. Në tekstin e saj thuhet se gjykata nuk ka konfirmuar të drejtën e shqiptarëve për shkëputje nga Serbia dhe se secesioni i njëanshëm është mënyrë e papranueshme për zgjidhjen e çështjeve territoriale.