Server: GJND-ja mbyll diskutimin për statusin dhe për ndarjen e Kosovës

Washingotn, 30 korrik 2010 - Ekspert i çështjeve të Ballkanit, Daniel Server thotë se Serbia është e detyruar moralisht të respektojë opinionin e Gjykatës Ndërkombëtare të Drejtësisë, pasi e kërkoi vetë atë. Në një intervistë për "Zërin e Amerikës", Server, i cili është analist i Institutit të Paqes, tha se qeverisja e mirë do ta ndihmojë Kosovën të sigurojë një numër sa më të madh njohjesh.
Lidhur me projektrezolutën për Kosovën të paraqitur nga Serbia në Asamblenë e Përgjithshme të Kombeve të Bashkuara, Server tha se opinioni i GJND "eliminon një pengesë për të ecur përpara". Ai thotë se "pyetja nëse shpallja e pavarësisë ishte e paligjshme ka marrë përgjigjen që ajo ishte e ligjshme". Andaj Server konsideron se "Beogradi dhe Prishtina do të ulen dhe të diskutojnë çështjet e shumta praktike që duhet të zgjidhen mes tyre".
Sa i përket deklaratave të Serbisë se nuk është e gatshme ta pranojë vendimin e GJND-së, Server nënvizoi se "opinioni ishte qartësisht në favor të Prishtinës". "Ka ardhur koha që Beogradi të pranojë atë që është e qartë për pjesën tjetër të botës. Dhe do të jetë e qartë se çfarë mendon pjesa tjetër e botës kur të ketë më shumë njohje. Mendoj se ajo që realizon dhënia e opinionit është zhvendosja e vëmendjes nga gjykata tek njohjet. Do të jetë interesante të shohim a do të jetë në gjendje Kosova të sigurojë njohjen e mbi 100 vendeve, një shifër që përbën në njëfarë mënyre kufirin e nevojshëm", theksoi Server.
I pyetur se çfarë hapash duhen ndërmarrë nga të dyja palët drejt stabilitetit dhe paqes, Server tha se pas opinionit "statusi nuk mund të diskutohet, dhe as ndarja". Sipas tij kjo "nuk është ide e mirë" dhe "do të sillte destabilitet, dhe jo stabilitet". Andaj ai mendon se Prishtina dhe Beogradi duhet të ulen të diskutojnë se cilat janë interesat legjitime të Serbisë në Veri të Kosovës dhe sesi ato mund të plotësohen pa dëmtuar interesat legjitime të Kosovës. Ky lloj problemi, thotë Server , mund të zgjidhet me vullnetin e mirë nga të dyja palët, "por kërkon që Prishtina ta pranojë se Serbia ka interesa legjitime për mbrojtjen e popullsisë serbe të Kosovës si edhe objektet dhe monumentet serbe". "Por gjithashtu Serbia duhet ta pranojë se Kosova ka interesin legjitim që të ruajë tërësinë dhe sovranitetin e territorit të saj". Sa i përket objektivit të Kosovës në frontin diplomatik, Server tha se "Prishtina ka punë për të bërë", ndërsa tani rëndësia qëndron tek njohjet, thotë ai. "Duhet të përqendrohen dhe të sigurojnë 30 njohje të reja deri në fund të vitit", tha Server.